Kryeministri teknik Talat Xhaferi, sot në shkollën në të cilën ka mësuar në Forinë të Gostivarit, tha se edhe në pozitën e tij të re do të punojë me përgjegjësi për të arsyetuar besimin që i është dhënë.
Në lidhje me festën e 7 Marsit, Ditës së Shkollës së Parë Shqipe, Xhaferi tha se “duhet të kontribuojmë që gjeneratat e ardhshme të kenë arsim më të mirë”.
“Deshi fati që në politikë të na jepet mundësia e përfaqësimit që e kemi dëshiruar me dekada. Mbështetja juaj kulminoi me besimin e detyrave më të rëndësishme në vend duke drejtuar institucionet më të larta. Shtatë vite si kryetar i Kuvendit me përgjegjësi të plota për të arsyetuar besimin tuaj dhe se në mesin tonë kemi bijë dhe bija që i dalin zot çdo detyre dhe besimit”, tha mes tjerash Xhaferi.
Ai gjithashtu tregoi se një skulpturë e rilindasve që e ka marrë nga ish-ushtarët e tij e ka mbajtur në zyrën e tij në Kuvend, ndërsa sot ia ka dorëzuar drejtoreshës së shkollës nga e cila ka dalë ai.
