I diplomuari i parë i verbër në Fakultetin e Shkencave Kompjuterike në Universitetin e Parmës është një shqiptar. Bëhet fjalë për Kledian Lekën, një i ri nga Shqipëria por me banim në komunën e Casalmaggiore (Kremones) në Itali.
“La Repubblica” shkruan se ai ka përfunduar kursin trevjeçar të titulluar “Edukimi i Shkencave Kompjuterike. Strategjitë dhe mjetet për akses gjithëpërfshirës për nxënësit me dëmtime shikimi” me një tezë me vlerësim “110 cum laude”, pra shkëlqyeshëm.
“Teza ime mund të jetë një manual për të ndihmuar fëmijët me dëmtime të plota ose të pjesshme të shikimit. Nuk kishte materiale mësimore për nxënësit e verbër, kështu që u nisa për të përkthyer dhe konvertuar të gjitha dokumentet tradicionale mbi të cilat ata studionin në braille (sistem leximi për personat e verbër), në mënyrë që ato të ishin edhe të lexueshme për ne të verbërit”, ka thënë ai për edicionin milanez të Corriere della Sera.
Kledian Leka u ka shpërndarë një pyetësor nxënësve të tjerë të verbër, në të cilin u kërkonte të tregonin propozimet dhe mbi të gjitha pengesat për të kapërcyer. Përmbledhja e përgjigjeve që ata dhanë u përfshi në tezën e tij.
Gjatë rrugës ai takoi studentë, të cilët pas disa muajsh vendosën të largoheshin nga universiteti të dekurajuar nga vështirësitë dhe tani, falë angazhimit të tij, kanë shpresa më konkrete për të ecur përpara.
“Nga sot – thotë ai – Universiteti i Parmës, dhe ndoshta universitete të tjera, do të kenë një pikënisje me të cilën do të krahasohen dhe nga e cila do të marrin frymëzim për të përmirësuar aksesin.”
Kledian Leka në moshën 11 vjeçare pësoi një aksident që i hoqi shikimin, kurse sot është programues i një kompanie shumëkombëshe. “Vazhdova të punoja, nga ora 08:00 deri në 13:00. Pastaj, nga ora 14:00 deri në 2:00 u angazhova për të studiuar. Nuk kam menduar kurrë të ndalem dhe të ndjej keqardhje për veten time dhe vendosa të luftoj për të realizuar të gjitha ëndrrat e mia.”
Ai u diplomua si ekspert IT me nota të larta dhe është i regjistruar në regjistrin kombëtar të mësuesve të IT, dhe i kualifikuar për të trajnuar atletë të verbër pasi ka ushtruar atletikën në nivel garues për dy vjet. Ai gjithashtu drejton një blog aksesueshmërie të quajtur Çelësi i aksesueshmërisë.
Teza e Kledianit me titull “Edukimi i Shkencave Kompjuterike. Strategjitë dhe mjetet për akses gjithëpërfshirës për nxënësit me dëmtime shikimi” është një manual i vërtetë për të lehtësuar mësimin e shkencave kompjuterike nga studentët me dëmtime në shikim.
Meqenëse nuk ka një material specifik mësimor për të verbërit, Kledianit iu desh të përkthente dhe konvertonte të gjitha dokumentet e nevojshme për kursin e tij të studimit në alfabetin Braille. Një punë pioniere që çoi në krijimin e një burimi të çmuar për të gjithë studentët që gjenden në të njëjtën situatë.
Kledian Leka është i vetëdijshëm për të qenë një model për brezat e ardhshëm të studentëve me aftësi të kufizuara. Historia e tij tregon se me përkushtim dhe këmbëngulje është e mundur të kapërceni çdo pengesë dhe të arrini qëllimet tuaja.
