Sekretarja e Përgjithshme e PDK-së, Vlora Çitaku, ka thënë se mësimi kryesor që duhet ta marrë kryeministri i vendit, Albin Kurti, nga zgjedhjet presidenciale në Maqedoninë e Veriut, pas ndërhyrjeve të njëpasnjëshme në Shqipëri, Preshevë e Mal të Zi, është që të mos përzihet aty ku nuk e ka vendin.
Çitaku, përmes në postimi në Facebook, tha se Kurti, mandatin e ka fituar për kryeministër të Kosovës e jo për sundimtar të shqiptarëve.
“Tash Albin, eja flasim për inflacionin, koston e papërballueshme të jetesës në Kosovë, rritjen e çmimit të energjisë, mungesën e projekteve zhvillimore, korrupsionin serioz në nivelet më të larta të qeverisjes ( sipas raportit të Departamentit të Shtetit ), ndërhyrjen e qeverisë në sistemin e drejtësisë, ngufatjen e lirisë së mediave ( raporti i Freedom House ), asociacionin me kompetenca ekzekutive, sanksionet e BE, etj etj. Apo këto janë tema të vogla për ju?”, shkroi Çitaku.
Më tej, Çitaku i tha Kurtit se është zgjedhur për ta qeverisur Kosovën, e jo për t’i përçarë shqiptarët gjithandej.
Edhe kreu i LDK-së, Lumir Abdixhiku, akuzoi kryeministrin Albin Kurti dhe tërë aparatit qeveritar për një qasje populiste dhe për ndërhyrje aktive që sipas tij, ka kontribuar në përçarjen e votuesve shqiptarë në Maqedoninë e Veriut.
“U bë një përpjekje e qartë institucionale për të influencuar rezultatet e zgjedhjeve, jo për të bashkuar, por për të përçarë akoma më shumë”, tha Abdixhiku, duke bërë thirrje për një politikë më unifikuese dhe bashkëpunuese nga Kosova ndaj shqiptarëve në rajon.
Kryeministri i vendit, Albin Kurti, ka përkrahur kandidatin shqiptar, Arben Taravarin, në garën për zgjedhjet presidenciale në Maqedoninë e Veriut.
Nga kandidatët shqiptarë atje, Taravari është renditur i dytë, pas Bujar Osmanit nga Fronti Evropian.
