Një ngjarje e rëndë po aq dhe misterioze raportohet të ketë ndodhur në provincën e Azerbajxhanit Lindor. Sipas informacioneve të deri tanishme, të cilat vlen për tu theksuar që nuk janë ende të konfirmuara, helikopteri me të cilin presidenti iranian, Ebrahim Raisi, po udhëtonte është rrëzuar për shkak të kushteve atmosferike jo të favorshme.
Në bordin e helikopterin ndodhej gjithashtu edhe ministri i Jashtëm Hossein Amir Abdollahian si dhe disa zyrtarë të tjerë. Menjëherë 20 ekipe shpëtimi dhe dronë janë dërguar në zonën ku u rrëzua helikopteri, mirëpo deri tani nuk ka asnjë gjurmë nga presidenti iranian.
Presidenti dhe ministri, së bashku me një grup personalitetesh ishin në bordin e helikopterit ku dhe po ktheheshin nga një ceremoni inaugurimi për hapjen e një dige në kufirin e Iranit me Azerbajxhanin.
“Në zonë janë dërguar 20 ekipe shpëtimi dhe dronë, por për shkak të kushteve malore si dhe kushteve të pafavorshme të motit, veçanërisht mjegullës së madhe, operacioni i kërkim-shpëtimit do të marrë kohë”, tha IRNA.
IRNA raportoi gjithashtu, duke cituar banorët vendas, se helikopteri u rrëzua në zonën e Pyllit Dizmar midis fshatrave Ozi dhe Pir Davood. Banorët në Varzeqan verior, Provinca e Azerbajxhanit Lindor, thanë se dëgjuan një zhurmë të fortë.
