Të premten në rrugën “Zekirja Cana” në Prishtinë, banorët dëgjuan një shpërthim të fuqishëm, që sipas Policisë së Kosovës kishte qenë një granatë dore.
Siç njofton Policia e Kosovës për klankosova.tv, informata për shpërthim ishte pranuar në orën 7 të mëngjesit, ku janë dëmtuar gjashtë vetura.
Bëhet e ditur se nuk ka persona të lënduar, teksa terreni është pastruar nga njësia për menaxhimin e mjeteve shpërthyese.
“Policia menjëherë ka dalë në vendin e ngjarjes dhe nga informacionet e para bëhet e ditur se si pasojë e shpërthimit nga fragmentet e mjetit shpërthyes gjashtë vetura janë dëmtuar përderisa nuk raportohet për pasoja në njerëz. Përgjatë kryerjes së ekzaminimit të vendngjarjes rruga është bllokuar për lëvizje ndërkaq njësia për menaxhimin e mjeteve shpërthyese ka bërë pastrimin e terrenit”- njoftoi për klankosova.tv, zëdhënësi i Policisë së Kosovës për rajonin e Prishtinës, Agron Borovci.
