Personi që shihni në foto është 27-vjeçari Bajram Luli, i riu që u ekzekutua mbrëmjen e së hënës në Londër.
Sipas mediave vendase mësohet se i riu shqiptar, me origjinë nga Peqini, u gjet rreth orës 17:30 të së hënës i plagosur në automjetin e tij në perëndim të Londrës, në Sudbury Heights Avenue, Greenford. Menjëherë i riu shqiptar u dergua në spital, mirëpo fatkeqësisht nuk mundi t’ i mbijetonte plagëve të marra.
Luli është me origjinë nga Peqini dhe kishte vetëm shumë pak kohë që kishte shkuar në Londër. Ngjarja ndodhi dy ditë më parë, mirëpo ditën e djeshme trupi i të riut shqiptar është mundur të identifikohet nga familjarët.
Policia britanike ka publikuar pamjet e një personi i cili dyshohet se është vrasësi i të riu shqiptar. Në foton e publikuar autori i dyshuar për vrasjen e Lulit shihet teksa futet në një stacion metroje aty pranë në Sudbury.
Kryeinspektori Jim Shirley tha se kjo foto është shumë e qartë dhe u bëri thirrje të gjithë qytetarëve që kanë informacione lidhur me të të kontaktojnë me autoritetet.
“Ky është një imazh shumë i qartë dhe do të dëshiroja që kushdo që e njeh këtë njeri të kontaktojë menjëherë policinë. Hetimi po vazhdon me ritme të shpejta dhe ne po punojmë për të siguruar drejtësi për familjen dhe miqtë e të riut që u godit me thikë për vdekje”, tha efektivi.
Ekzekutimi i Bajram Lulit çon në dy numrin e shqiptarëve të vrarë në Angli gjatë këtyre tre muajve të parë të 2024. Në 4 shkurt 2024, Bledi Petraj, u godit me thikë për vdekje në rrugën Queen Elizabeth’s Drive, N14 në Veri të Londrës më 4 Shkurt 2024.
